Mae cynlluniau’n cael eu datblygu i greu coetiroedd newydd i fynd i’r afael â newid hinsawdd ledled y sir.
Mae Cyngor Sir Ddinbych wedi lansio cyfnod ymgysylltu â’r cyhoedd er mwyn helpu i greu ardaloedd o goetir newydd.
Cafodd bron i 5,000 o goed eu plannu yn gynharach eleni mewn pedwar safle yn y sir er mwyn helpu i leihau allyriadau carbon a gwella bioamrywiaeth.
Yn ogystal â hyn cafodd 18,000 o goed eu plannu ar hyd a lled y sir fel rhan o ffocws Cynllun y Cyngor ar gyfer 2017-22 i warchod yr amgylchedd naturiol a hefyd cynnal a gwella bioamrywiaeth yn y sir.
Ym mis Gorffennaf 2019, pasiodd y Cyngor gynnig i ddatgan Argyfwng Newid Hinsawdd ac Ecolegol. Ffurfiwyd gweithgor trawsbleidiol i oruchwylio datblygiad Strategaeth ar Newid Hinsawdd a Newid Ecolegol.
Mae’r Cyngor hefyd wedi ymrwymo i geisio bod yn Gyngor Di-garbon Net ac Ecolegol Gadarnhaol erbyn 2030.
Bydd y prosiect hwn i greu coetiroedd yn helpu’r Cyngor i gyflawni’r nod o fod yn ddi-garbon drwy gyfrannu at y swm o garbon a gaiff ei ddal a’i storio (neu’i amsugno).
Bydd ardaloedd ar Ffordd Parc Bodnant ym Mhrestatyn, Dol Corwenna yng Nghorwen a’r hen safle tirlenwi yn Henllan yn cynorthwyo i gyflawni’r targed Ecolegol Gadarnhaol trwy helpu’r Cyngor i wella cyfoeth y rhywogaethau ar dir lleol.
Mae’r Cyngor hefyd yn gweithio i blannu hyd at 10,000 o goed ar draws y safleoedd newydd dewisedig.
Bydd cyfnod yr arolwg i geisio barn trigolion ynglŷn â chreu’r tri safle newydd yn Sir Ddinbych yn para o 31 Hydref tan 14 Tachwedd.
Dywedodd y Cynghorydd, Barry Mellor, Aelod Arweiniol yr Amgylchedd a Chludiant: “Mae parhau â’n prosiect creu coetiroedd yn hanfodol i’n galluogi i fynd i’r afael â newid hinsawdd yn Sir Ddinbych. Mae’r adborth a gawn gan bawb trwy’r arolygon hyn yn bwysig i’n helpu i fapio dyfodol y safleoedd hyn.
“Hoffem glywed eich barn am ddyluniadau’r coetiroedd gan gynnwys dewisiadau ar gyfer coed dathlu ym mhob safle, lleoedd i eistedd yn y safleoedd a syniadau am arwyddion gwybodaeth ar gyfer pob coetir ac unrhyw syniadau addas eraill ar gyfer y tir.
“Rydym hefyd yn awyddus i glywed a hoffai trigolion gymryd rhan ym mhob safle trwy weithgareddau megis diwrnod plannu coed a chyfleoedd eraill i wirfoddoli neu gael hyfforddiant.
I gael gafael ar yr arolwg a gwybodaeth bellach am y pedwar safle, edrychwch ar y dolenni isod:
Dol Corwenna, Corwen
https://countyconversation.denbighshire.gov.uk/projectcy/694
Ffordd Parc Bodnant, Prestatyn
https://countyconversation.denbighshire.gov.uk/projectcy/692
Gerddi'r Coroni, Y Rhyl
https://countyconversation.denbighshire.gov.uk/projectcy/696
Ardaloedd glaswelltir preswyl (Prestatyn Y Rhyl)
https://countyconversation.denbighshire.gov.uk/projectcy/698