Parc Poced: Porth Canol Tref y Rhyl

Hoffem adeiladu ‘parc poced’ yng Nghanol Tref y Rhyl.

Mae ‘parciau poced’ yn ardaloedd bach gyda man gwyrdd (coed, planhigion, ac ati) a lleoedd i eistedd, sy’n groesawgar a hygyrch i bawb.

Mae’r parc poced arfaethedig ar ran ddeheuol y Stryd Fawr, ar y gornel â Ffordd Brighton. Wedi ei leoli gerllaw Pont Vale Road (a elwir weithiau yn Bont Morrisons), mae mewn ardal sy’n cael ei hystyried yn borth i Ganol Tref y Rhyl.

Prynodd y Cyngor yr adeiladau a dymchwel rhan ohonynt yn 2022 gyda chymorth cyllid gan Lywodraeth Cymru dan ei Rhaglen Trawsnewid Trefi. Yr oedd gofyniad cyfreithiol arnom i ddymchwel 123-125 Stryd Fawr am nad oeddynt yn ddiogel yn saernïol ac mewn perygl o chwalu.

Y cynllun yw dymchwel gweddill yr adeiladau ar y safle a chael parc poced yn eu lle.

Yr ydym wedi penderfynu peidio â chael adeiladau newydd yn lle’r adeiladau sydd wedi eu dymchwel am y rhesymau canlynol:

• Nid yw’n hyfyw yn economaidd i adnewyddu’r adeiladau
• Mae dymchwel yn rhoi’r cyfle i greu porth mwy deniadol i ganol y dref
• Mewn gwaith blaenorol a wnaethom yng Nghanol Tref y Rhyl, dywedodd pobl wrthym nad oedd digon o leoedd braf i eistedd
• Yng nghanol tref y Rhyl mae’r lefel isaf o ‘orchudd canopi’ (h.y. amgylchedd naturiol fel coed a phlanhigion) o blith unrhyw dref bron yng Nghymru. Bydd creu man newydd gyda phlanhigion a choed o gymorth i fynd i’r afael â hyn
• Nid oes galw am safleoedd preswyl neu fanwerthu newydd yn y lleoliad hwn

Gobeithiwn y gallwn gynorthwyo i ddod â mannau croesawgar, naturiol, yn ôl i Ganol Tref y Rhyl drwy greu parc poced ar safle’r adeiladau sydd wedi eu dymchwel.

Cymerwch olwg ar argraff arlunydd o’r parc poced isod a gadewch i ni wybod os oes gennych unrhyw adborth neu gwestiynau.

Parc poced Porth y Rhyl: golygfa ogledd-ddwyrain

Mae’r ddelwedd yn dangos golygfa o dop bws yn edrych i gyfeiriad y gogledd-ddwyrain ar y parc cyfan.

• Ar flaen y safle mae gwelyau blodau uchel gyda phlanhigion cynhenid wedi eu plannu yno, wedi eu cysgodi gan goed bedw arian, a fydd yn gwella bioamrywiaeth leol.
• Mae mynedfeydd i’r parc o’r Stryd Fawr a Ffordd Brighton, ac mae mynediad gwastad i’r safle drwyddo draw. Rheolir mynediad i’r safle trwy gyfres o folardiau, a fydd yn sicrhau bod y parc yn aros yn addas i gerddwyr. Mae standiau beiciau i’r cyhoedd eu defnyddio ger mynedfa’r parc o’r Stryd Fawr, a fydd yn annog a hybu teithio llesol.
• Yng nghefn y safle mae wal gwaith maen 3m o uchder gyda bargod copin llechen, a fydd yn cael ei gorchuddio â llystyfiant dringol fel eiddew a gwyddfid. O flaen y wal 3m hon mae gwely plannu yn cynnwys coed bedw arian a blodau gwylltion, wedi ei fframio â wal gynnal frics (600mm o uchder) sydd â bargod copin llechen.
• Mae gan y dyluniad arfaethedig ardal gron yn y canol i bobl ymgynnull, gyda dwy fainc grom yng nghanol yr ardal a chyfres o feinciau ar yr ymylon i ganiatáu i bobl gael saib (eistedd a threulio amser) rhwng y ddau wely o blanhigion.
• Daeth arwyddion hanesyddol ar dalcen adeilad i’r amlwg yn ystod y broses o ddymchwel 123-125 Stryd Fawr. Gobeithir y gellir ailbaentio’r arwyddion hyn a’u hadfer, yn amodol ar ymgynghoriad â pherchnogion yr eiddo a’u cytundeb.

Parc poced Porth y Rhyl: golygfa ogledd-ddwyrain (nos)

Mae’r ddelwedd yn dangos golygfa o dop bws yn edrych i gyfeiriad y gogledd-ddwyrain ar y parc cyfan, fel y byddai’n edrych yn y nos

• Mae yna golofnau goleuadau stryd uwch ben i ddarparu gwelededd a diogelwch.
• Bydd goleuadau sy’n goleuo am i lawr ar y wal gefn a goleuadau ar lefel y ddaear yn y gwelyau planhigion yn gwneud i’r parc edrych yn fwy deniadol yn ystod oriau tywyllach.

Parc poced Porth y Rhyl: golygfa ogledd-orllewin

Mae’r ddelwedd yn dangos golygfa i gyfeiriad y gogledd-orllewin ar lefel y ddaear, fel pe baech yn sefyll ar Ffordd Brighton, y tu allan i adeilad Apollo Bingo yn fras.

Parc poced Porth y Rhyl: golygfa dde-ddwyrain

Mae’r ddelwedd yn dangos golygfa i gyfeiriad y de-ddwyrain ar lefel y ddaear, fel pe baech yn sefyll ar y Stryd Fawr, y tu allan i Tim’s Coffee Lounge neu asiant eiddo Reeds Rains yn fras.

Fersiwn print: ffurflen adborth parc poced canol tref Y Rhyl PDF(840KB)