Mae cam cyntaf y gwaith gosod y tu mewn i Farchnad y Frenhines yn y Rhyl wedi dechrau.
Wedi diwrnod agored llwyddiannus y mis diwethaf, pan ddaeth mwy na naw deg o ddarpar werthwyr i gael taith o amgylch y safle a thrafod y potensial i weithredu busnesau ar y safle hanesyddol hwn, mae’r gwaith yn mynd rhagddo y tu mewn i’r adeilad.
Mae’r cam cyntaf yn cynnwys gosod dodrefn, goleuadau a chamerâu teledu cylch cyfyng yn ogystal â gwaith trydanol hanfodol gydol yr adeilad.
Mae Marchnad y Frenhines wedi bod yn rhan allweddol o dref y Rhyl ers 1902 ac fe’i defnyddiwyd mewn amryw wahanol ffyrdd ar hyd y blynyddoedd.
Mae’r datblygiad newydd yn cynnwys un ar bymtheg o unedau bwyd a manwerthu, bar dwy ochr ac ardal ddigwyddiadau fawr i gynnal digwyddiadau a marchnadoedd neu osod mwy o seddi.
Dywedodd y Cynghorydd Jason McLellan, Arweinydd Cyngor Sir Ddinbych ac Aelod Arweiniol Twf Economaidd a Threchu Amddifadedd:
“Roedd yn wych gweld cymaint o fusnesau lleol yn dod i’r diwrnodau agored. Roedd yn gyfle bendigedig i ddangos beth all y farchnad ei gynnig i fusnesau lleol a sut y gallent ffynnu yma. Fe gafwyd sgyrsiau addawol dros ben rhwng darpar werthwyr a thîm Marchnad y Frenhines ac mae hynny bellach yn dwyn ffrwyth.
Yn ogystal â meithrin cyswllt â darpar werthwyr, mae’r gwaith wedi dechrau ar ddatblygu a gosod y tu mewn i’r adeilad.
Mae Marchnad y Frenhines ynghanol y Rhyl, dafliad carreg o’r traeth gydag un fynedfa’n arwain o’r stryd fawr ac un arall yn mynd at y prom, sy’n golygu y bydd yn haws i bobl fynd yn syth o’r stryd fawr i lan y môr.
Mae’r datblygiad yn rhan bwysig o’r weledigaeth gyffredinol ar gyfer y Rhyl, ynghyd â’r datblygiadau eraill i adfywio’r dref mewn blynyddoedd diweddar.”