Talu rhent tai cymdeithasol

Fe gewch chi dalu’r rhent mewn sawl ffordd, felly dewiswch y ffordd sydd orau i chi.

Talu ar-lein

Fe fedrwch chi ddefnyddio eich cerdyn debyd neu eich cerdyn credyd i dalu eich rhent ar-lein.

Debyd Uniongyrchol

Os oes gennych chi gyfrif banc neu gyfrif cymdeithas adeiladu, dyma’r ffordd hawsaf o dalu. Bydd eich rhent yn cael ei dalu o’ch cyfrif chi yn awtomatig bob mis.

Os hoffech chi drefnu debyd uniongyrchol, cysylltwch â ni i gael ffurflen mandad debyd uniongyrchol (gwefan allanol) neu ffoniwch ni ar 01824 706000.

Archeb Sefydlog

Os hoffech chi drefnu archeb sefydlog, cysylltwch â ni ar 01824 706000 neu cysylltwch â ni ar-lein (gwefan allanol) a gallwn ni drefnu bod ffurflen sy’n cynnwys y manylion perthnasol i gyd yn cael ei hanfon atoch chi. Gallwch chi fynd â hon i’r banc a byddan nhw’n gallu trefnu’r cyfan i chi. Fel arall, os ydych chi’n defnyddio bancio ar-lein, gallwn ni roi manylion banc i chi er mwyn i chi allu trefnu hyn eich hun.

Cerdyn rhent

Os oes gennych chi gerdyn llithro, gallwch chi ddefnyddio hwn i dalu eich rhent mewn swyddfa bost neu Siop Un Alwad. Mae’n rhaid i chi dalu ag arian parod ac mae isafswm taliad o £5. Os fyddwch chi’n colli’ch cerdyn llithro, cysylltwch â ni ar 01824 706000 neu cysylltwch â ni ar-lein (gwefan allanol) i drafod dewisiadau eraill sydd ar gael i chi oherwydd dydyn ni ddim yn cyflwyno rhai newydd bellach.

Talu dros y ffôn

Fe gewch chi ddefnyddio eich cerdyn debyd neu eich cerdyn credyd i dalu dros y ffôn. Pan fyddwch chi’n ein ffonio ni bydd angen i chi fod â’ch cyfeirnod rhent neu eich cerdyn plastig ar gyfer talu’r rhent, ac fe wnawn ni ofyn am eich enw a’ch cyfeiriad chi hefyd.

lein dalu awtomataidd 24 awr ar 0300 4562 499
01824 706000 (o ddydd Llun i ddydd Iau: 9am i 5pm. Dydd Gwener: 9am i 4:30pm)

Talu trwy’r post

Fe gewch chi dalu eich rhent trwy anfon siec neu archeb bost yn daladwy i Gyngor Sir Ddinbych i:

Siop Un Alwad Y Rhyl
Stryd yr Eglwys
Y Rhyl
LL18 3AA

Gofynnir yn garedig i chi nodi eich cyfeirnod rhent, a’ch enw a’ch cyfeiriad gyda’r taliad, os gwelwch yn dda. Dim ond os ydych chi wedi gofyn am dderbynneb y byddwn ni’n anfon un atoch chi.

Problemau talu’r rhent?

Os ydych chi’n cael anhawster talu eich rhent, efallai y bydd gennych chi’r hawl i fudd-dal tai. Os nad ydych chi’n cael Budd-dal Tai neu Gredyd Cynhwysol ar hyn o bryd, ond yn credu y gallech chi fod yn gymwys, gallwch chi ddod o hyd i wybodaeth a chyngor yn ein hadran budd-daliadau, grantiau a chyngor ariannol.

I drafod sut y gallwn ni eich helpu chi, cysylltwch â ni ar-lein (gwefan allanol) neu ffoniwch ni ar 01824 706000.

Gwybodaeth bwysig am gynnydd mewn rhent a budd-daliadau

O ganlyniad i’r cynnydd blynyddol mewn rhent, bydd angen i chi gymryd camau os ydych chi’n cael Credyd Cynhwysol.

Elfen costau tai Credyd Cynhwysol

Os ydych chi’n cael Credyd Cynhwysol, mae’n rhaid i chi ddweud wrth yr Adran Gwaith a Phensiynau am y cynnydd yn eich rhent cyn gynted â phosibl. Os na fyddwch chi’n gwneud hyn, mae perygl y byddwch chi’n colli’r cyfle i hawlio’r swm y mae gennych hawl iddo tuag at eich rhent.

I gofnodi’r newid hyn, mewngofnodwch i’ch cyfrif yn:

GOV.UK: Mewngofnodwch i’ch cyfrif Credyd Cynhwysol (gwefan allanol)

Ffoniwch ni ar 01824 706000 os bydd angen cymorth arnoch chi i ddeall eich rhent a ffioedd gwasanaeth.

Budd-dal Tai

Os ydych chi’n cael Budd-Dal Tai, nid oes angen i chi wneud dim. Bydd eich cyfrif yn cael ei ddiweddaru’n awtomatig i ddangos y newidiadau. Bydd yr Adran Budd-dal Tai yn ysgrifennu atoch chi pan fyddan nhw wedi canfod faint o Fudd-dal Tai y byddwch chi’n ei gael.